from Sringeri.net
गोविन्दाष्टकम्
govindāṣṭakam
सत्यं ज्ञानमनन्तं नित्यमनाकाशं परमाकाशं
गोष्ठप्राङ्गणरिङ्खणलोलमनायासं परमायासम् ।
मायाकल्पितनानाकारमनाकारं भुवनाकारं
क्ष्मामानाथमनाथं प्रणमत गोविन्दं परमानन्दम् ॥ १ ॥
satyaṃ jñānamanantaṃ nityamanākāśaṃ paramākāśaṃ
goṣṭhaprāṅgaṇariṅkhaṇalolamanāyāsaṃ paramāyāsam ;
māyākalpitanānākāramanākāraṃ bhuvanākāraṃ
kṣmāmānāthamanāthaṃ praṇamata govindaṃ paramānandam . 1 .
मृत्स्नामत्सीहेति यशोदाताडनशैशवसन्त्रासं
व्यादितवक्त्रालोकितलोकालोकचतुर्दशलोकालिम् ।
लोकत्रयपुरमूलस्तम्भं लोकालोकमनालोकं
लोकेशं परमेशं प्रणमत गोविन्दं परमानन्दम् ॥ २ ॥
mṛtsnāmatsīheti yaśodātāḍanaśaiśavasantrāsaṃ
vyāditavaktrālokitalokālokacaturdaśalokālim ;
lokatrayapuramūlastambhaṃ lokālokamanālokaṃ
lokeśaṃ parameśaṃ praṇamata govindaṃ paramānandam . 2 .
त्रैविष्टपरिपुवीरघ्नं क्षितिभारघ्नं भवरोगघ्नं
कैवल्यं नवनीताहारमनाहारं भुवनाहारम् ।
वैमल्यस्फुटचेतोवृत्तिविशेषाभासमनाभासं
शैवं केवलशान्तं प्रणमत गोविन्दं परमानन्दम् ॥ ३ ॥
traiviṣṭaparipuvīraghnaṃ kṣitibhāraghnaṃ bhavarogaghnaṃ
kaivalyaṃ navanītāhāramanāhāraṃ bhuvanāhāram ;
vaimalyasphuṭacetovṛttiviśeṣābhāsamanābhāsaṃ
śaivaṃ kevalaśāntaṃ praṇamata govindaṃ paramānandam . 3 .
गोपालं भूलीलाविग्रहगोपालं कुलगोपालं
गोपीखेलनगोवर्धनधृतिलीलालालितगोपालम् ।
गोभिर्निगदितगोविन्दस्फुटनामानं बहुनामानं
गोधीगोचरदूरं प्रणमत गोविन्दं परमानन्दम् ॥ ४ ॥
gopālaṃ bhūlīlāvigrahagopālaṃ kulagopālaṃ
gopīkhelanagovardhanadhṛtilīlālālitagopālam ;
gobhirnigaditagovindasphuṭanāmānaṃ bahunāmānaṃ
godhīgocaradūraṃ praṇamata govindaṃ paramānandam . 4 .
गोपीमण्डलगोष्टीभेदं भेदावस्थमभेदाभं
शश्वद्गोखुरनिर्धूतोद्गतधूलीधूसरसौभाग्यम् ।
श्रद्धाभक्तिगृहीतानन्दमचिन्त्यं चिन्तितसद्भावं
चिन्तामणिमहिमानं प्रणमत गोविन्दं परमानन्दम् ॥ ५ ॥
gopīmaṇḍalagoṣṭībhedaṃ bhedāvasthamabhedābhaṃ
śaśvadgokhuranirdhūtodgatadhūlīdhūsarasaubhāgyam ;
śraddhābhaktigṛhītānandamacintyaṃ cintitasadbhāvaṃ
cintāmaṇimahimānaṃ praṇamata govindaṃ paramānandam . 5 .
स्नानव्याकुलयोषिद्वस्त्रमुपादायागमुपारूढं
व्यादित्सन्तीरथ दिग्वस्त्रा दातुमुपाकर्षन्तं ताः ।
निर्धूतद्वयशोकविमोहं बुद्धं बुद्धेरन्तःस्थं
सत्तामात्रशरीरं प्रणमत गोविन्दं परमानन्दम् ॥ ६ ॥
snānavyākulayoṣidvastramupādāyāgamupārūḍhaṃ
vyāditsantīratha digvastrā dātumupākarṣantaṃ tāḥ ;
nirdhūtadvayaśokavimohaṃ buddhaṃ buddherantaḥsthaṃ
sattāmātraśarīraṃ praṇamata govindaṃ paramānandam . 6 .
कान्तं कारणकारणमादिमनादिं कालघनाभासं
कालिन्दीगतकालियशिरसि सुनृत्यन्तं मुहुरत्यन्तम् ।
कालं कालकलातीतं कलिताशेषं कलिदोषघ्नं
कालत्रयगतिहेतुं प्रणमत गोविन्दं परमानन्दम् ॥ ७ ॥
kāntaṃ kāraṇakāraṇamādimanādiṃ kālaghanābhāsaṃ
kālindīgatakāliyaśirasi sunṛtyantaṃ muhuratyantam ;
kālaṃ kālakalātītaṃ kalitāśeṣaṃ kalidoṣaghnaṃ
kālatrayagatihetuṃ praṇamata govindaṃ paramānandam . 7 .
बृन्दावनभुवि बृन्दारकगणबृन्दाराधितवन्द्यायां
कुन्दाभामलमन्दस्मेरसुधानन्दं सुमहानन्दम् ।
वन्द्याशेषमहामुनिमानसवन्द्यानन्दपदद्वन्द्वं
नन्द्याशेषगुणाब्धिं प्रणमत गोविन्दं परमानन्दम् ॥ ८ ॥
bṛndāvanabhuvi bṛndārakagaṇabṛndārādhitavandyāyāṃ
kundābhāmalamandasmerasudhānandaṃ sumahānandam ;
vandyāśeṣamahāmunimānasavandyānandapadadvandvaṃ
nandyāśeṣaguṇābdhiṃ praṇamata govindaṃ paramānandam . 8 .
गोविन्दाष्टकमेतदधीते गोविन्दार्पितचेता यो
गोविन्दाच्युत माधव विष्णो गोकुलनायक कृष्णेति ।
गोविन्दाङ्घ्रिसरोजध्यानसुधाजलधौतसमस्ताघो
गोविन्दं परमानन्दामृतमन्तस्स्थं स तमभ्येति ॥ ९ ॥
govindāṣṭakametadadhīte govindārpitacetā yo
govindācyuta mādhava viṣṇo gokulanāyaka kṛṣṇeti ;
govindāṅghrisarojadhyānasudhājaladhautasamastāgho
govindaṃ paramānandāmṛtamantassthaṃ sa tamabhyeti . 9 .
॥ गोविन्दाष्टकं सम्पूर्णम् ॥
. govindāṣṭakaṃ sampūrṇam
